കോവിഡ്: ജയിലിൽ നിന്ന് കൂടുതൽ പേരെ വിട്ടയക്കാൻ സുപ്രീംകോടതി; പുറത്തിറങ്ങിയവരെ തിരിച്ചെത്താൻ നിർബന്ധിക്കേണ്ട

news image
Jan 28, 2022, 7:54 pm IST payyolionline.in

ന്യൂഡൽഹി: കേരളത്തിലെ ജയിലുകളിൽ നിന്ന്​ പരോളിലോ ഇടക്കാല ജാമ്യത്തിലോ വിട്ട തടവുകാർ ഉടനടി തിരിച്ചെത്തണമെന്ന്​ നിർബന്ധിക്കാതെ, കോവിഡ്​ പെരുപ്പം കണക്കിലെടുത്ത്​ കൂടുതൽ പേരെ തൽക്കാലം വീടുകളിൽ പോകാൻ അനുവദിക്കണമെന്ന്​ സുപ്രീംകോടതി.

കാലാവധി അവസാനിച്ച തടവുകാരെ തിരിച്ചെത്താൻ ജയിൽ അധികൃതർ നിർബന്ധിക്കുന്നുവെന്ന്​ ചൂണ്ടിക്കാട്ടി, താൽക്കാലിമായി ജയിൽ മോചിതരായ ചിലർ നൽകിയ അപേക്ഷ പരിഗണിക്കുകയായിരുന്നു കോടതി. കേരളത്തിൽ പ്രതിദിനം 55,000ൽപരം പേർക്ക്​ പുതുതായി കോവിഡ്​ ബാധിക്കുന്നതിനിടയിൽ ജയിലിലേക്ക്​ മടങ്ങാൻ നിർബന്ധിക്കുന്നത്​ എന്തുകൊണ്ടാണെന്ന്​ ജസ്റ്റിസുമാരായ എൽ. നാഗേശ്വര റാവു, ബി.ആർ ഗവായി എന്നിവർ ഉൾപ്പെട്ട ബെഞ്ച്​ കേരളത്തിന്‍റെ അഭിഭാഷകൻ പി.വി സുരേന്ദ്രനാഥിനോട്​ ചോദിച്ചു. കോവിഡ്​ വ്യാപനം ഉണ്ടായതിനു പിന്നാലെ 2020 മാർച്ചിൽ ജയിലിലെ ആൾപ്പെരുപ്പ പ്രശ്നത്തിൽ കോടതി സ്വമേധയാ കേസെടുത്തിരുന്നു.

സംസ്ഥാനങ്ങളിൽ ഉന്നതാധികാര സമിതി രൂപവൽക്കരിച്ച്​ തടവുകാരെ വിട്ടയക്കുന്ന കാര്യത്തിൽ തീരുമാനമെടുക്കാൻ നിർദേശിക്കുകയും ചെയ്തു. അതനുസരിച്ച്​ നിരവധി പേരെ പരോളിൽ വിട്ടു. കോവിഡ്​ കാലത്തെ ജയിൽ സാഹചര്യങ്ങൾ മുൻനിർത്തി, കീഴടങ്ങാനുള്ള കാലാവധി പല തവണ നീട്ടി. അതിനിടയിൽ കുറെ പേർ ജയിലിലെത്തി കീഴടങ്ങി. മറ്റുള്ളവരുടെ കാര്യത്തിൽ ജയിൽ അധികൃതർ നിർബന്ധം തുടരുന്നുവെന്നാണ്​ പരാതി.

Get daily updates from payyolionline

Subscribe Newsletter

Subscribe on telegram

Subscribe