കണ്ണൂർ ∙ വന്ദേഭാരത് എക്‌സ്പ്രസ് ട്രെയിനിനു നേരെ വീണ്ടും കല്ലേറ്. കാസർകോട്ടു നിന്നു തിരുവനന്തപുരത്തേക്കുള്ള യാത്രയ്ക്കിടെ ഇന്നലെ വൈകിട്ട് 3.27നു വളപട്ടണം റെയിൽവേ സ്റ്റേഷന്റെ രണ്ടാം പ്ലാറ്റ്‌ഫോമിനു സമീപമാണു ട്രെയിനിനു നേരെ കല്ലേറുണ്ടായത്.ട്രെയിനിന്റെ ഗാർഡിന്റെ തൊട്ടുപിന്നിലെ എസി ചെയർകാർ കോച്ചിലാണു കല്ല് പതിച്ചത്. ഗ്ലാസിനു തൊട്ടുതാഴെ ആയതിനാൽ കാര്യമായ നാശനഷ്ടമില്ല. കല്ലു പതിച്ച ഭാഗത്തു പെയിന്റ് ഇളകിയിട്ടുണ്ട്. ട്രെയിൻ നിർത്താതെ യാത്ര തുടർന്നു. മേയ് ഒന്നിനു രാത്രി മലപ്പുറം തിരുനാവായയ്ക്കു സമീപം വന്ദേഭാരതിനു നേരെയുണ്ടായ കല്ലേറിൽ ഗ്ലാസിനു കേടുപാടു സംഭവിച്ചിരുന്നു.