ബംഗളൂരു: കന്നഡ നടന്‍ ദര്‍ശന്‍ തൂഗുദീപയുടെ വളര്‍ത്തുനായ്ക്കളുടെ ആക്രമണത്തില്‍ യുവതിക്ക് പരിക്കേറ്റു.യുവതി നല്‍കിയ പരാതിയുടെ അടിസ്ഥാനത്തില്‍ ദര്‍ശനും രണ്ട് സഹായികള്‍ക്കുമെതിരെ പൊലീസ് കേസെടുത്തു. വീടിനു സമീപം കാര്‍ പാര്‍ക്ക് ചെയ്യുന്നതുമായി ബന്ധപ്പെട്ട് ദര്‍ശന്റെ സഹായികളുമായി വാക്കുതര്‍ക്കമുണ്ടായതിനു പിന്നാലെയാണ് അവിടത്തെ വളര്‍ത്തുനായ്ക്കള്‍ തന്നെ ആക്രമിച്ചെന്നു യുവതി പൊലീസ് സ്‌റ്റേഷനില്‍ നല്‍കിയ പരാതിയില്‍ പറയുന്നു.
കഴിഞ്ഞ ദിവസം ബംഗളൂരു ആര്‍ആര്‍ നഗറിലെ ദര്‍ശന്റെ വസതിക്കു സമീപം ചടങ്ങില്‍ പങ്കെടുക്കാന്‍ എത്തിയ യുവതി ചടങ്ങിനുശേഷം കാറിനു സമീപം എത്തിയപ്പോള്‍ നായ്ക്കളെ കണ്ടെന്നും അതിനെ മാറ്റാന്‍ നടന്റെ സഹായികളോടാവശ്യപ്പെട്ടപ്പോള്‍ അവര്‍ വിസമ്മതിച്ചെന്നും തുടര്‍ന്നുണ്ടായ വാക്കേറ്റതിനു ശേഷം നായ്ക്കള്‍ ആക്രമിക്കുകയായിരുന്നുവെന്നും യുവതി പൊലീസിന് മൊഴി നല്‍കി. തടയാന്‍ സഹായികള്‍ ഒന്നും ചെയ്തില്ലെന്നും പരാതിയില്‍ പറയുന്നു. വയറിനു പരുക്കേറ്റ യുവതി ആശുപത്രിയില്‍ ചികിത്സ തേടി.
