ന്യൂഡൽഹി: കുറ്റാരോപിതർക്ക് വാട്സ്ആപ് വഴി നോട്ടീസ് അയക്കൽ പറ്റില്ലെന്ന് സുപ്രീംകോടതി. ഇലക്ട്രോണിക് മാധ്യമങ്ങൾ ഇതിനായി ഉപയോഗിക്കാൻ ക്രിമിനൽ ചട്ടത്തിൽ വ്യവസ്ഥയില്ലെന്ന് ബെഞ്ച് വ്യക്തമാക്കി. ചട്ടപ്രകാരം മാത്രമേ നോട്ടീസ് നൽകാവൂ എന്ന കാര്യം പൊലീസിനെ ഉത്തരവായി അറിയിക്കണമെന്ന് ജസ്റ്റിസുമാരായ എം.എം. സുന്ദരേശ്, രാജേഷ് ബിന്ദൽ എന്നിവരുടെ ബെഞ്ച് എല്ലാ സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും നിർദേശം നൽകി.
ഒരു കേസിൽ അമിക്കസ് ക്യൂറിയായ മുതിർന്ന അഭിഭാഷകൻ സിദ്ധാർഥ് ലൂത്റയാണ് ഇക്കാര്യം കോടതിയോട് നിർദേശിച്ചത്. പിന്നാലെ ബെഞ്ച് നിർദേശം നൽകുകയായിരുന്നു. നേരത്തേ വാട്സ്ആപ് വഴി നോട്ടീസ് നൽകിയിട്ടും കുറ്റാരോപിതൻ അന്വേഷണ ഉദ്യോഗസ്ഥൻ മുമ്പാകെ ഹാജരാകാതിരുന്നത് ലൂത്റ കോടതിയുടെ ശ്രദ്ധയിൽപെടുത്തി.
ജാമ്യത്തിന് പുതിയ നിയമം കൊണ്ടുവരില്ല -കേന്ദ്രം
ന്യൂഡൽഹി: ജാമ്യത്തിന് പുതിയ നിയമം കൊണ്ടുവരില്ലെന്ന് കേന്ദ്ര സർക്കാർ സുപ്രീംകോടതിയെ അറിയിച്ചു. 2023ലെ ഭാരതീയ ന്യായ സുരക്ഷ സംഹിതയിലെ വ്യവസ്ഥകൾതന്നെ മതിയെന്നും കേന്ദ്ര സർക്കാർ സമർപ്പിച്ച സത്യവാങ്മൂലത്തിൽ വ്യക്തമാക്കി. 2022ൽ ഒരു കേസിലെ വിധി പ്രസ്താവത്തിനിടെയാണ് സുപ്രീംകോടതി ഇത്തരമൊരു ശിപാർശ നടത്തിയത്. ബ്രിട്ടനിലുള്ളത് പോലെ ജാമ്യത്തിനായി സമഗ്രമായ ഒരു നിയമം കൊണ്ടുവരണമെന്നതായിരുന്നു നിർദേശം.
സുപ്രീംകോടതി യഥാർഥ ജനകീയ കോടതി -സഞ്ജീവ് ഖന്ന
ന്യൂഡൽഹി: സുപ്രീംകോടതി ഇന്ത്യയിലെ 140 കോടി പൗരന്മാരുടെ അഭിലാഷങ്ങളെ പ്രതിഫലിപ്പിക്കുന്ന യഥാർഥ ജനകീയ കോടതിയാണെന്ന് ചീഫ് ജസ്റ്റിസ് സഞ്ജീവ് ഖന്ന. പരമോന്നത കോടതിയുടെ 75ാം വാർഷികാഘോഷ ചടങ്ങിൽ സംസാരിക്കുകയായിരുന്നു അദ്ദേഹം.
കെട്ടിക്കിടക്കുന്ന കേസുകൾ, വർധിച്ചുവരുന്ന ചെലവുകൾ, അസത്യ പ്രയോഗം എന്നിവയാണ് നീതി ന്യായ വ്യവസ്ഥ നേരിടുന്ന ഭീഷണികളെന്നും അദ്ദേഹം കൂട്ടിച്ചേർത്തു. ഭരണഘടനയോടൊപ്പം 1950 ജനുവരി 26നാണ് സുപ്രീംകോടതി നിലവിൽവന്നത്. 1950 ജനുവരി 28ന് ഔദ്യോഗികമായി ഉദ്ഘാടനം ചെയ്തു. തുടക്കത്തിൽ പഴയ പാർലമെന്‍റ് മന്ദിരത്തിൽ പ്രവർത്തിച്ച കോടതി 1958ലാണ് തിലക് മാർഗിലെ നിലവിലെ സ്ഥലത്തേക്ക് മാറിയത്.
