ബൈറൂത്ത്: സെൻട്രൽ ബൈറൂത്തിൽ ഇസ്രായേൽ സേന നടത്തിയ ആക്രമണത്തിൽ ഹിസ്ബുല്ല വക്താവ് മുഹമ്മദ് അഫീഫ്കൊല്ലപ്പെട്ടു. റാസ് അൽ-നബാ ജില്ലയിൽ സിറിയൻ ബാത്ത് പാർട്ടിയുടെ ലെബനൻ ശാഖ ഓഫീസിനു നേർക്കുണ്ടായ ആക്രമണത്തിലാണ് ഹിസ്ബുല്ല വക്താവ് കൊല്ലപ്പെട്ടത്. ആക്രമണത്തിൽ മൂന്നു പേർക്ക് പരിക്കേൽക്കുകയും ചെയ്തു.
ബാത്ത് പാർട്ടിയുടെ ലെബനീസ് ബ്രാഞ്ച് സെക്രട്ടറി ജനറൽ അലി ഹിജാസി മുഹമ്മദ് അഫീഫിന്‍റെ മരണം സ്ഥിരീകരിച്ചു. പ്രാദേശിക, വിദേശ മാധ്യമപ്രവർത്തകരുമായി ബന്ധപ്പെട്ടിരുന്നതടക്കം വർഷങ്ങളായി ഹിസ്ബുല്ലയുടെ മീഡിയ റിലേഷൻസിന്‍റെ ഉത്തരവാദിത്തം വഹിച്ചിരുന്നത് അഫീഫായിരുന്നു.
ബൈറൂത്തിന്‍റെ തെക്കൻ പ്രാന്തപ്രദേശങ്ങളിൽ ഇസ്രായേൽ നടത്തുന്ന ആക്രമണങ്ങളെ തുടർന്ന് പലായനം ചെയ്ത നിരവധമ്പേർ ഈ ഭാഗങ്ങളിലാണ് അഭയം പ്രാപിച്ചിരുന്നത്. ഇവിടെ മുന്നറിയിപ്പില്ലാതെയാണ് ഇസ്രായേൽ ആക്രമണം നടത്തിയത്.
