കാക്കനാട്∙ വനിതകളുടെ പരാതി പരിഹരിക്കാൻ സിനിമാ രംഗത്തുള്ളതുപോലുള്ള സമിതി സീരിയൽ രംഗത്തും രൂപീകരിക്കുമെന്നു വനിതാ കമ്മിഷൻ അധ്യക്ഷ പി. സതീദേവി പറഞ്ഞു. നടിമാരും സാങ്കേതികപ്രവർത്തകരുമായ സീരിയൽ രംഗത്തെ വനിതകൾക്കു നിർഭയമായി ജോലി ചെയ്യാനുള്ള സൗകര്യമൊരുക്കലാണു ലക്ഷ്യം. കൊച്ചിയിൽ വനിതാ കമ്മിഷന്റെ സ്ഥിരം കൗൺസലിങ് കേന്ദ്രം സ്ഥാപിക്കും. തിരുവനന്തപുരം കഴിഞ്ഞാൽ ഏറ്റവും കൂടുതൽ പരാതികൾ വനിതാ കമ്മിഷനു ലഭിക്കുന്നത് എറണാകുളം ജില്ലയിൽ നിന്നാണ്. തൊഴിൽ സ്ഥാപനങ്ങളിൽ വനിതകൾക്കായുള്ള പരാതി പരിഹാര സംവിധാനം പ്രവർത്തിക്കുന്നുണ്ടെന്നുറപ്പാക്കും. സമൂഹമാധ്യമങ്ങളിലൂടെയുള്ള ദുരുപയോഗത്തിനിടയാകുന്നവരിൽ കൂടുതലും പെൺകുട്ടികളാണെന്നതിനാൽ ഇവർക്കായി ബോധവൽക്കരണ പരിപാടി സംഘടിപ്പിക്കുമെന്നും അധ്യക്ഷ പറഞ്ഞു.
