തിരുവനന്തപുരം: ഓണാവധിയും വേളാങ്കണ്ണി പള്ളി പെരുന്നാളും പ്രമാണിച്ച് യാത്രക്കാരുടെ തിരക്ക് ഒഴിവാക്കാൻ വേളാങ്കണ്ണി റൂട്ടിൽ അധിക ട്രെയിൻ സർവീസ് ആരംഭിച്ചു. എറണാകുളം – വേളാങ്കണ്ണി റൂട്ടിലും, തിരുവനന്തപുരം – വേളാങ്കണ്ണി റൂട്ടിലുമാണ് സർവീസ് ആരംഭിക്കുന്നത്.

ആ​ഗസ്‌ത് 28 മുതൽ സെപ്‌തംബർ 11 വരെയുള്ള തിങ്കളാഴ്‌ചകളിൽ എറണാകുളം – വേളാങ്കണ്ണി വീക്കിലി സ്പെഷ്യൽ ഫെയർ സ്പെഷ്യൽ ട്രെയിൻ (06039/06040) എറണാകുളത്ത് നിന്ന് പകൽ 1.10ന് പുറപ്പെടും. തിരികെ ചൊവ്വാഴ്‌ചകളിൽ വൈകിട്ട് 6.40ന് വേളാങ്കണ്ണിയിൽ നിന്നും പുറപ്പെടുന്ന ട്രെയിൻ ബുധനാഴ്‌ച പകൽ 11.40ന് എറണാകുളത്തെത്തും. കോട്ടയം, തെന്മല വഴിയാണ് സർവീസ്.

ആ​ഗസ്‌ത് 23 മുതൽ സെപ്‌തംബർ ആറുവരെയുള്ള ബുധനാഴ്‌ചകളിൽ തിരുവനന്തപുരം സെൻട്രൽ വേളാങ്കണ്ണി (06020/06019 ) വീക്കിലി സ്പെഷ്യൽ ഫെയർ സ്പെഷ്യൽ ട്രെയിൻ പുലർച്ചെ നാലിന് തിരുവനന്തപുരത്ത് നിന്ന് പുറപ്പെടും. തിരികെയുള്ള സർവീസ് വ്യാഴാഴ്‌ചകളിൽ വൈകിട്ട് 6.40ന് വേളാങ്കണ്ണിയിൽ നിന്ന് പുറപ്പെട്ട് വെള്ളിയാഴ്‌ച രാവിലെ 7.30ന് തിരുവനന്തപുരത്ത് എത്തും.