കണ്ണൂർ : അതിസുരക്ഷാ സംവിധാനങ്ങളുള്ള കണ്ണൂർ വനിതാ ജയിലിന് മുകളിലൂടെ അജ്ഞാതർ ഡ്രോൺ പറത്തി. മാർച്ച് 1 ന് രാത്രി 11.15 ഓടെയാണ് സംഭവം. ജയിലിനകത്തെ ഓഫീസ്‌ കെട്ടിടത്തിന് 25 മീറ്റർ ഉയരത്തിലാണ് ജയിൽസുരക്ഷയ്ക്ക് ഭീഷണിയായി ഡ്രോൺ പറത്തിയത്.
ചുവപ്പും പച്ചയും നിറങ്ങളുള്ള ലൈറ്റുകൾ പ്രകാശിപ്പിച്ച് കെട്ടിടം രണ്ടുതവണ വലംവെച്ചാണ് ഡ്രോൺ അപ്രത്യക്ഷമായത്. ജയിൽ ജീവനക്കാരാണ് സൂപ്രണ്ടിനെ ഇക്കാര്യം വിളിച്ചറിയിച്ചത്. തുടർന്ന് സൂപ്രണ്ട് ടൗൺ പോലീസിൽ പരാതി നൽകി.
ഡ്രോൺ പറത്തിയത് ആരാണെന്ന്‌ തിരിച്ചറിഞ്ഞിട്ടില്ലെന്ന് പോലീസ് പറഞ്ഞു. വിവാഹത്തിനോ മറ്റ് പ്രധാന ആഘോഷങ്ങൾക്കോ മാത്രമാണ് ഡ്രോൺ പറത്തി ദൃശ്യങ്ങളെടുക്കാറുള്ളത്. എന്നാൽ സമീപ പ്രദേശത്ത് ശനിയാഴ്ച വിവാഹമോ ഉത്സവമോ നടന്നിട്ടില്ലെന്ന് പോലീസ് പറഞ്ഞു. സെൻട്രൽ ജയിലിന് സമീപം ജില്ലാ ജയിലും സ്പെഷ്യൽ സബ് ജയിലുമാണുള്ളത്. ഇതിന് പിറകിലായിട്ടാണ് വലിയ മതിലുകളാൽ ചുറ്റപ്പെട്ട വനിതാ ജയിൽ സ്ഥിതിചെയ്യുന്നത്.
