ഫുട്ബോളിൽ മന്ത്രികം തീർക്കുന്ന നിരവധി കലാകാരന്മാരാണുള്ളത്. അവരുടെ ഓരോ ചലനങ്ങളും ഫുട്ബോൾ പ്രേമികളെ ആവേശത്തിൽ ആകാറുണ്ട്. പ്രത്യേകിച്ച് പന്ത് ഹെഡ് ചെയ്യുന്ന നിമിഷങ്ങളിൽ അവർ രാജാവായി മാറുകയാണ്. എന്നാൽ ഇത്തരത്തിൽ ഫുട്ബോളിൽ സ്ഥിരമായി പന്ത് ഹെഡ് ചെയ്യുന്നത് തലച്ചോറിന്റെ ഘടനയിൽ മാറ്റങ്ങൾ വരുത്താമെന്ന് ആണ് പുതിയ പഠനം പറയുന്നത്.
അമേരിക്കൻ അക്കാദമി ഓഫ് ന്യൂറോളജിയുടെ മെഡിക്കൽ ജേണലായ ന്യൂറോളജിയിൽ 2025 സെപ്റ്റംബർ 17-ന് പ്രസിദ്ധീകരിച്ച പഠനത്തിലാണ് ഈ കണ്ടെത്തൽ. അമച്വർ ഫുട്ബോൾ കളിക്കാരിലാണ് ഈ മാറ്റങ്ങൾ കൂടുതലായി കണ്ടുവരുന്നത്. ഫുട്ബോൾ ഹെഡിംഗ് തലച്ചോറിൽ മാറ്റങ്ങൾക്ക് കാരണമാകുന്നു എന്ന് ഈ പഠനം ഉറപ്പിച്ചു പറയുന്നില്ല, മറിച്ച് ഇവ തമ്മിൽ ഒരു ബന്ധമുണ്ടെന്ന് ചൂണ്ടിക്കാണിക്കുക മാത്രമാണ് ചെയ്യുന്നത്.
ന്യൂയോർക്കിലെ കൊളംബിയ യൂണിവേഴ്സിറ്റിയിലെ ഗവേഷകനായ മൈക്കിൾ എൽ. ലിപ്ടണിന്റെ നേതൃത്വത്തിൽ നടന്ന ഈ പഠനത്തിൽ, കൂടുതൽ തവണ ഹെഡ് ചെയ്യുന്ന കളിക്കാരുടെ തലച്ചോറിലെ മടക്കുകളിൽ (folds) ഒരു പ്രത്യേക പാളിയിൽ തകരാറുകൾ കണ്ടെത്തി. ഈ തകരാറുകൾ അവരുടെ ചിന്താശേഷിയെയും ഓർമ്മയെയും മോശമായി ബാധിച്ചതായും പഠനത്തിൽ വ്യക്തമായി. “കായികം തലച്ചോറിന്റെ ആരോഗ്യത്തിന് ഗുണകരമാണെങ്കിലും, ഫുട്ബോൾ പോലുള്ള കായിക വിനോദങ്ങളിൽ തലയ്ക്ക് ആവർത്തിച്ചുണ്ടാകുന്ന ആഘാതങ്ങൾ ഈ ഗുണങ്ങളെ ഇല്ലാതാക്കാൻ സാധ്യതയുണ്ട്,” എന്ന് ഡോ. ലിപ്ടൺ പറഞ്ഞു.
പഠനത്തിൽ 26 വയസ്സ് ശരാശരി പ്രായമുള്ള 352 അമച്വർ ഫുട്ബോൾ കളിക്കാരും, തലയ്ക്ക് ക്ഷതമേൽക്കാൻ സാധ്യതയില്ലാത്ത കായിക വിനോദങ്ങളിൽ ഏർപ്പെടുന്ന 23 വയസ്സ് ശരാശരി പ്രായമുള്ള 77 കായികതാരങ്ങളും പങ്കെടുത്തു. ഒരു വർഷത്തിനിടെ തലയ്ക്ക് എത്ര ആഘാതങ്ങൾ ഏറ്റിട്ടുണ്ടെന്ന് കണ്ടെത്താൻ ഓരോ കായികതാരത്തോടും ചോദിച്ചു. ഫുട്ബോൾ കളിക്കാരെ ഹെഡ് ചെയ്യുന്നതിന്റെ എണ്ണമനുസരിച്ച് നാല് ഗ്രൂപ്പുകളായി തിരിച്ചു. ഏറ്റവും കൂടുതൽ ഹെഡ് ചെയ്യുന്ന ഗ്രൂപ്പിലുള്ളവർ വർഷത്തിൽ ശരാശരി 3,152 ഹെഡ്ഡറുകൾ ചെയ്തപ്പോൾ, ഏറ്റവും കുറഞ്ഞ ഗ്രൂപ്പിലുള്ളവർ 105 എണ്ണം മാത്രമാണ് ചെയ്തത്.
എല്ലാ കായികതാരങ്ങളെയും ബ്രെയിൻ സ്കാനിന് വിധേയരാക്കി. തലച്ചോറിന്റെ പുറംപാളിയായ സെറിബ്രൽ കോർട്ടക്സിനോട് ചേർന്നുള്ള വെളുത്ത ദ്രവ്യത്തിന്റെ (juxtacortical white matter) ഘടനയാണ് ഗവേഷകർ പ്രധാനമായും പരിശോധിച്ചത്. സ്കാനുകൾ പരിശോധിച്ചപ്പോൾ, കൂടുതൽ ഹെഡ് ചെയ്യുന്ന കളിക്കാരുടെ തലച്ചോറിലെ ഈ ഭാഗത്ത് ജലകണികകളുടെ ചലനം താളംതെറ്റിയതായി കണ്ടെത്തി. ഇത് തലച്ചോറിന്റെ സൂക്ഷ്മഘടനയ്ക്ക് തകരാറ് സംഭവിച്ചതിന്റെ സൂചനയാണ്. ഹെഡ്ഡറുകളുടെ എണ്ണം കൂടുന്നതിനനുസരിച്ച് ഈ തകരാറും വർധിക്കുന്നതായി നിരീക്ഷിച്ചു.
പഠനത്തിൽ പങ്കെടുത്തവരുടെ ചിന്താശേഷിയും ഓർമ്മശക്തിയും പരിശോധിക്കുന്നതിനുള്ള ടെസ്റ്റുകൾ നടത്തിയിരുന്നു. തലച്ചോറിലെ ജലകണികകളുടെ ചലനത്തിൽ കൂടുതൽ ക്രമക്കേടുകൾ കണ്ടെത്തിയ കളിക്കാർക്ക് ഈ ടെസ്റ്റുകളിൽ മോശം പ്രകടനമാണ് കാഴ്ചവെക്കാനായത്. കൺപുരികത്തിന് തൊട്ടുമുകളിലുള്ള ഓർബിറ്റോഫ്രോണ്ടൽ (orbitofrontal) ഭാഗത്തെ തകരാറുകളാണ് ചിന്താശേഷിയെയും ഓർമ്മയെയും പ്രധാനമായും ബാധിക്കുന്നതെന്നും ഗവേഷകർ കണ്ടെത്തി.
“തലയ്ക്ക് ആവർത്തിച്ചേൽക്കുന്ന ആഘാതങ്ങൾ തലച്ചോറിലെ വെളുത്ത ദ്രവ്യത്തിന്റെ ഈ പാളിയെയാണ് കൂടുതലായി ബാധിക്കുന്നത്. അതിനാൽ, കായികരംഗവുമായി ബന്ധപ്പെട്ട തലച്ചോറിലെ പരിക്കുകൾ നേരത്തെ കണ്ടെത്താൻ ഈ ഭാഗം പരിശോധിക്കുന്നത് സഹായകമായേക്കാം,” എന്ന് ഡോ. ലിപ്ടൺ കൂട്ടിച്ചേർത്തു. എന്നാൽ, കളിക്കാർ നൽകിയ ഓർമ്മയെ അടിസ്ഥാനമാക്കിയാണ് ഹെഡ്ഡറുകളുടെ എണ്ണം കണക്കാക്കിയത് എന്നതടക്കമുള്ള ചില പരിമിതികൾ ഈ പഠനത്തിനുണ്ട്. ഇതുസംബന്ധിച്ച് കൂടുതൽ ഗവേഷണങ്ങൾ ഈ വിഷയത്തിൽ ആവശ്യമാണെന്നും പഠനസംഘം വ്യക്തമാക്കി.
