തിരുവനന്തപുരം: സംസ്ഥാനത്ത് വേനൽച്ചൂട് കടുത്തതോടെ വൈദ്യുതി ഉപഭോഗം റെക്കോർഡ് വേഗത്തിൽ കുതിച്ചുയരുന്നു. ഏപ്രിൽ മാസത്തിൽ മിക്ക ദിവസങ്ങളിലും ഉപഭോഗം 100 ദശലക്ഷം യൂണിറ്റിന് (MU) മുകളിലാണ്. കഴിഞ്ഞ വർഷത്തെ അപേക്ഷിച്ച് പ്രതിദിനം ശരാശരി എട്ടു ദശലക്ഷം യൂണിറ്റിന്റെ വർധനവാണ് ഇത്തവണ രേഖപ്പെടുത്തിയിരിക്കുന്നത്. ഉപഭോഗം വർധിച്ചതോടെ പുറത്തുനിന്ന് കൂടുതൽ വൈദ്യുതി വാങ്ങേണ്ടി വരുന്നത് ഉപഭോക്താക്കളുടെ മേൽ അധിക സാമ്പത്തിക ബാധ്യത വരുത്തിവെക്കുമെന്ന് ഉറപ്പായി.
ഈ മാസം ഇതുവരെ മൂന്ന് ദിവസങ്ങൾ മാത്രമാണ് വൈദ്യുതി ഉപയോഗം 100 ദശലക്ഷം യൂണിറ്റിന് താഴെ എത്തിയത്. ഏപ്രിൽ മാസത്തിലെ ശരാശരി പ്രതിദിന ഉപഭോഗം 101.97 ദശലക്ഷം യൂണിറ്റാണ്. കഴിഞ്ഞ വർഷം ഇതേ കാലയളവിൽ ഇത് 93.57 യൂണിറ്റ് മാത്രമായിരുന്നു. ഏപ്രിൽ പത്തിന് രേഖപ്പെടുത്തിയ 107.70 ദശലക്ഷം യൂണിറ്റാണ് ഈ മാസത്തെ ഏറ്റവും ഉയർന്ന നിരക്ക്. ഏപ്രിൽ ഒന്നിന് 103.34 യൂണിറ്റും, ആറിന് 104.85 യൂണിറ്റും, പതിനൊന്നിന് 106.88 യൂണിറ്റും എന്നിങ്ങനെയാണ് പ്രധാന ദിവസങ്ങളിലെ കണക്കുകൾ.
ഉപഭോഗം ഉയർന്നതോടെ പുറത്തുനിന്ന് വൈദ്യുതി വാങ്ങുന്ന തോതും ഗണ്യമായി കൂടിയിട്ടുണ്ട്. ഏപ്രിൽ ഏഴിന് മാത്രം 86.58 ദശലക്ഷം യൂണിറ്റ് വൈദ്യുതിയാണ് മറ്റ് സംസ്ഥാനങ്ങളിൽ നിന്നും സ്വകാര്യ കമ്പനികളിൽ നിന്നും വാങ്ങിയത്. നിലവിൽ പ്രതിമാസ ബിൽ നൽകുന്നവർക്ക് ഇന്ധന സർചാർജ് വലിയ തോതിൽ ബാധകമല്ലെങ്കിലും, അടുത്ത മാസം മുതൽ ഇതിൽ മാറ്റമുണ്ടാകും. മാർച്ച് രണ്ടാം വാരം മുതൽ വൈദ്യുതി ഉപയോഗം കുത്തനെ ഉയർന്നതിനാൽ മെയ് മാസത്തെ ഇന്ധന സർചാർജിൽ കുറഞ്ഞത് 10 പൈസയുടെയെങ്കിലും വർധനവ് യൂണിറ്റിന് ഉണ്ടായേക്കുമെന്നാണ് കെ.എസ്.ഇ.ബി. നൽകുന്ന സൂചന. വരും ദിവസങ്ങളിൽ ചൂട് ഇനിയും വർധിക്കുകയാണെങ്കിൽ വൈദ്യുതി പ്രതിസന്ധി കൂടുതൽ രൂക്ഷമാകാൻ സാധ്യതയുണ്ട്.
