പെട്രോൾ പമ്പിൽ ശുചുമുറിയുടെ താക്കോൽ നൽകാത്തതിന് പമ്പ് ഉടമക്ക് ഉപഭോക്തൃ തർക്കപരിഹാര കോടതി 1,65,000 രൂപ പിഴ വിധിച്ചത് കഴിഞ്ഞ ദിവസമാണ്. ഏഴകുളം ഈരകത്ത്‌ ഇല്ലം വീട്ടില്‍ അധ്യാപികയായ സി.എല്‍. ജയകുമാരിയുടെ പരാതിയിലായിരുന്നു നടപടി. കോഴിക്കോട്‌ പയ്യോളിയിലുളള തെനംകാലില്‍ പെട്രോള്‍ പമ്പ് ഉടമ ഫാത്തിമ ഹന്നയ്ക്കെതിരെയാണ് കമ്മീഷൻ ഉത്തരവിട്ടത്. ഈ സംഭവം പല യാത്രികർക്കും പുതിയൊരു അറിവിലേക്കായിരിക്കും വെളിച്ചം വീശുന്നത്.
ഇന്ത്യയിൽ, പെട്രോൾ പമ്പുകൾ ശരിയായ ടോയ്‌ലറ്റ് സൗകര്യങ്ങളും മറ്റ് നിർബന്ധിത സേവനങ്ങളും നൽകാൻ വിസമ്മതിച്ചാൽ, ലൈസൻസ് റദ്ദാക്കുന്നത് ഉൾപ്പെടെയുള്ള നടപടികൾ നേരിടേണ്ടിവരും എന്ന കാര്യം പല യാത്രികർക്കും അറിയാൻ ഇടയില്ല. പെട്രോളിയം ആൻഡ് നാച്ചുറൽ ഗ്യാസ് റെഗുലേറ്ററി ബോർഡും (PNGRB) മറ്റ് പ്രാദേശിക ഭരണകൂടങ്ങളും ഇന്ധന സ്റ്റേഷനുകൾക്ക് മാനദണ്ഡങ്ങൾ നിശ്ചയിക്കുന്നുണ്ട്. അതിൽ ശുചിത്വം പാലിക്കുന്നത് ഉൾപ്പെടെ അവശ്യ സൗകര്യങ്ങൾ നൽകുന്നതും ഉൾപ്പെടുന്നു. ഈ മാനദണ്ഡങ്ങൾ പാലിക്കുന്നുണ്ടോ എന്ന് നോക്കിയാണ് ഈ സ്ഥാപനങ്ങൾക്ക് ലൈസൻസ് നൽകുന്നത്. പക്ഷേ ഈ നിയമങ്ങളെക്കുറിച്ച് നമ്മളിൽ താരതമ്യേന ചുരുക്കം പേർ മാത്രമേ അറിയൂ എന്നതാണ് ദൗർഭാഗ്യകരമായ യാഥാർത്ഥ്യം. എന്നാൽ പെട്രോൾ പമ്പുകളിൽ ടോയിലറ്റ് സേവനം മാത്രമല്ല സൌജന്യമായി നൽകേണ്ടത്. മറ്റുചില സേവനങ്ങൾ കൂടിയുണ്ട്. നമ്മുടെ രാജ്യത്തെ എല്ലാ പെട്രോൾ സ്റ്റേഷനുകളിലും ലഭ്യമായ ചില സൗജന്യ സേവനങ്ങളെക്കുറിച്ച് അറിയാം.
ശരിയായ ടോയ്‌ലറ്റ് സൗകര്യങ്ങൾ
യാത്ര ചെയ്യുമ്പോൾ ബാത്ത്റൂം ഉപയോഗിക്കണമെങ്കിൽ പെട്രോൾ പമ്പിൽ പോയി ടോയ്‌ലറ്റ് ഉപയോഗിക്കുക. ഒരു വ്യക്തിയുടെ അടിസ്ഥാന ആവശ്യകത ആണിത്. ഈ ആവശ്യം ഒരു പെട്രോൾ പമ്പ് ഉടമയ്ക്ക് നിരസിക്കാൻ കഴിയില്ല. ശുചിമുറിയും വിശ്രമമുറിയും ഉപയോഗിക്കാൻ നിങ്ങളെ അനുവദിക്കുന്നില്ലെങ്കിൽ അഥവാ വൃത്തിഹീനമായ ശൗചാലയം ആണെങ്കിൽ നിങ്ങൾക്ക് അധികൃതർക്ക് പരാതി നൽകാം.
ഫിൽട്ടർ ചെയ്തതും ശുദ്ധവുമായ കുടിവെള്ളം
നീണ്ട കാർ യാത്രകളിൽ, ധാരാളം വെള്ളം കുടിക്കേണ്ടത് അത്യാവശ്യമാണ്. പെട്രോൾ പമ്പുകളിൽ നിന്നും സൗജന്യമായി ശുദ്ധമായ കുടിവെള്ളം നിങ്ങൾക്ക് ഉപയോഗിക്കാനുള്ള അവകാശം ഉണ്ട്. പെട്രോൾ പമ്പ് നിയമപ്രകാരം വെള്ളം നൽകണം.
ടയറുകളിൽ സൗജന്യ വായു
റോഡുകളിൽ വാഹനങ്ങൾ കുതിക്കണമെങ്കിൽ അവയുടെ ടയറുകളിൽ വായു ഉണ്ടായിരിക്കണം. ടയറുകളിലെ വായു മർദ്ദം കുറയുന്നത് ഡ്രൈവിംഗിന് ഉൾപ്പെടെ വെല്ലുവിളിയാകും. അത്തരമൊരു സാഹചര്യത്തിൽ പുറത്തുപോകുമ്പോഴെല്ലാം വാഹനത്തിൻ്റെ ടയറുകളിലെ വായു ഒരു ടയർ ഷോപ്പിൽ പരിശോധിക്കേണ്ടിവരും. പക്ഷേ ഈ സേവനത്തിന് ഞങ്ങൾ ഫീസ് നൽകണം. എന്നാൽ പെട്രോൾ പമ്പിൽ നിങ്ങൾക്ക് ഈ സേവനം സൗജന്യമായി ലഭിക്കും.
അഗ്നി സുരക്ഷാ ഉപകരണം
പെട്രോൾ പമ്പിന് സമീപം നിങ്ങൾ തീപിടിത്തം പോലുള്ള പ്രശ്‌നങ്ങൾ നേരിടുകയാണെങ്കിൽ, അത് കെടുത്താൻ നിങ്ങൾക്ക് അഗ്നി സുരക്ഷാ ഉപകരണങ്ങളും ഒരു ബക്കറ്റ് മണലും ഉപയോഗിക്കാം. അതിലൂടെ തീ നിയന്ത്രണ വിധേയമാക്കാം. എവിടെയും ഉപയോഗിക്കാവുന്ന സൗജന്യ അഗ്നി സുരക്ഷാ ഉപകരണങ്ങൾ പെട്രോൾ പമ്പുകളിൽ ലഭ്യമാണ്.
ഫസ്റ്റ് എയിഡ് ബോക്സ്
വഴിയിൽ അപകടങ്ങൾ സംഭവിക്കുകയും നിങ്ങൾക്ക് പരിക്കേൽക്കുകയും ചെയ്താൽ, നിങ്ങൾക്ക് ഒരു പെട്രോൾ സ്റ്റേഷനിൽ പ്രഥാമിക ചികിത്സയ്‌ക്കും സൗജന്യ ഡ്രെസിഗിനും നിർത്താം. ഒരു പ്രഥമശുശ്രൂഷ കിറ്റ് പെട്രോൾ പമ്പ് ഉടമ എപ്പോഴും കരുതിയിരിക്കണം. പ്രാഥമിക ചികിത്സ പെട്രോൾ പമ്പിൽ സൗജന്യമായി ലഭിക്കും.
മറ്റ് സേവനങ്ങൾ
ഒരു അമ്മയ്ക്ക് മുലപ്പാൽ കുടിക്കുന്ന ഒരു കുഞ്ഞുണ്ടെങ്കിൽ, കുഞ്ഞിന് മുലയൂട്ടാൻ ആവശ്യമായ ഫീഡിംഗ് റൂം ഇന്ധന സ്റ്റേഷനിൽ ഉണ്ടായിരിക്കണം. ഒരു പെട്രോൾ സ്റ്റേഷൻ്റെ ഉടമസ്ഥൻ അത്തരം സേവനങ്ങൾ നൽകാൻ വിസമ്മതിക്കുന്നു എങ്കിൽ പ്രാദേശിക അധികാരികൾക്കോ ജില്ലാ കളക്ടർക്കോ പരാതി ഫയൽ ചെയ്യാൻ നിങ്ങൾക്ക് അവകാശമുണ്ട്. അധികൃതർക്ക് പെട്രോൾ പമ്പിൻ്റെ ഉടമസ്ഥന് പിഴ ചുമത്താനും പെട്രോൾ പമ്പിന്‍റെ ലൈസൻസ് റദ്ദാക്കാനും സാധിക്കും. ഉപഭോക്താവിന് സൗകര്യമൊരുക്കുന്നതിനായി, സ്റ്റേഷൻ മാനേജരുടെയും ജീവനക്കാരുടെയും കോൺടാക്റ്റ് നമ്പറുകൾ ഒരു ചുമരിൽ പ്രദർശിപ്പിക്കണം എന്നതും നിർബനധമാണ്.
പെട്രോൾ പമ്പിലെ ഈ സേവനങ്ങൾ ഉപയോഗിക്കുന്നത് യാത്രികരുടെ അവകാശമാണ്. ഈ വ്യവസ്ഥകൾ സമ്മതിച്ചതിനു ശേഷം മാത്രമാണ് ഓരോ ഇന്ധന പമ്പിനും ലൈസൻസ് അനുവദിക്കുന്നത്. പൗരന്മാർക്ക് ഈ സേവനങ്ങൾ നൽകുന്നില്ലെങ്കിൽ പെട്രോൾ പമ്പ് ഉടമകളുടെ ലൈസൻസ് റദ്ദ് ചെയ്യപ്പെടുമെന്നും വ്യക്തമാക്കിയിട്ടുണ്ട്. അതുകൊണ്ട് പെട്രോൾ പമ്പിൽ നിങ്ങൾക്ക് തികച്ചും സൗജന്യമായി ലഭിക്കുന്ന ഈ സേവനങ്ങൾ തീർച്ചയായും ഉപയോഗിക്കുക.
