ആധാർ കാർഡിന്റെ രൂപം പാടെ മാറാൻ ഒരുങ്ങുന്നു. ഡിസംബർ 1 മുതൽ നിലവിൽ വരുന്ന പുതിയ സംവിധാനം അനുസരിച്ച്, ആധാർ കാർഡിൽ ഇനി ഫോട്ടോയും ക്യു.ആർ. കോഡും മാത്രമായിരിക്കും പ്രധാനമായും ഉണ്ടാകുക.

​യൂണീക്ക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ (UIDAI) കൊണ്ടുവരുന്ന ഈ മാറ്റത്തിലൂടെ, പേര്, വിലാസം, 12 അക്ക ആധാർ നമ്പർ എന്നിവയുൾപ്പെടെയുള്ള വ്യക്തിഗത വിവരങ്ങൾ ക്യു.ആർ. കോഡിൽ സുരക്ഷിതമായി എൻക്രിപ്റ്റ് ചെയ്യപ്പെടും.

പ്രധാന മാറ്റങ്ങൾ ഒറ്റനോട്ടത്തിൽ
​കാർഡിൽ ഇനി ഫോട്ടോയും ക്യു.ആർ. കോഡും മാത്രം.
​വ്യക്തിവിവരങ്ങൾ ക്യു.ആർ. കോഡിനുള്ളിൽ മറഞ്ഞിരിക്കും.
​ഡിജിറ്റൽ ഉപയോഗം നിർബന്ധമാക്കും.
​വ്യാജ ആധാർ നിർമ്മാണവും തട്ടിപ്പും തടയുകയാണ് ലക്ഷ്യം.
​പുതിയ കാർഡിന്റെ ഫോട്ടോകോപ്പി അനുവദിക്കില്ല.
​ആവശ്യക്കാർക്ക് ക്യു.ആർ. കോഡ് സ്കാൻ ചെയ്ത് ആവശ്യമായ വിവരങ്ങൾ മാത്രം ലഭ്യമാക്കാം. (ഉദാഹരണത്തിന്: പേരും ഫോട്ടോയും മാത്രം.

പുതിയ ആധാർ ഡൗൺലോഡ് ചെയ്യുന്നത് എങ്ങനെ?

​ഡിസംബർ ഒന്നു മുതൽ പുതിയ കാർഡ് ഡൗൺലോഡ് ചെയ്യുന്നതിനായുള്ള മൊബൈൽ ആപ്പ് നിലവിൽ വരും.
​ആൻഡ്രോയിഡ് ഫോണിൽ ഗൂഗിൾ പ്ലേ സ്റ്റോറിലും, ഐഫോണിൽ ആപ്പിൾ സ്റ്റോറിലും നിന്നും ‘Aadhaar’ എന്ന് ടൈപ്പ് ചെയ്ത് ആപ്പ് ഡൗൺലോഡ് ചെയ്യുക.
​ആധാർ നമ്പർ നൽകുക.
​ലിങ്ക് ചെയ്‌ത മൊബൈലിൽ വരുന്ന ഒ.ടി.പി. ഉപയോഗിച്ച് വിവരങ്ങൾ വെരിഫൈ ചെയ്യുക.

​മുഖത്തിന്റെ ചിത്രം സ്കാൻ ചെയ്ത് ആധികാരികത ഉറപ്പാക്കുക.
​ആറക്ക പിൻ നൽകുന്നതോടെ ആധാർ ഉപയോഗിച്ചു തുടങ്ങാം.
​ശ്രദ്ധിക്കുക: പുതിയ ആപ്പിൽ നിന്നും സ്ക്രീൻഷോട്ട് എടുക്കാനോ പ്രിന്റ് ചെയ്യാനോ കഴിയില്ല.

കുടുംബാംഗങ്ങൾക്കും ഒരു ഫോണിൽ

​ഒരു മൊബൈൽ ഫോൺ നമ്പറിൽ ഡൗൺലോഡ് ചെയ്യുന്ന ആപ്പിലൂടെ കുടുംബത്തിലെ അഞ്ചുപേരുടെ ആധാർ വരെ കൈകാര്യം ചെയ്യാം. സ്മാർട്ട് ഫോൺ ഇല്ലാത്തവർക്കും ഇതുവഴി ആധാർ ഉപയോഗിക്കാൻ സാധിക്കും. ഇതിനായി എല്ലാ കാർഡുകളും ഒരേ ഫോൺ നമ്പറിൽ രജിസ്റ്റർ ചെയ്യണം

​നിലവിലെ കാർഡ് ഉടൻ അസാധുവാകുമോ?

​സമ്പൂർണ്ണമായി പുതിയ സംവിധാനം വരുന്നതുവരെ നിലവിലെ കാർഡ് ഉപയോഗിക്കാം. അതിനുശേഷം മാത്രമേ നിലവിലെ കാർഡ് അസാധുവാക്കൂ. മാർഗ്ഗനിർദ്ദേശങ്ങൾ UIDAI പിന്നീട് പുറപ്പെടുവിക്കും.