നാദാപുരം: തെരഞ്ഞെടുപ്പ് ദിവസം ബൂത്തിന് മുന്നിലുണ്ടായ അനിഷ്ടസംഭവത്തിൽ നൂറോളം സി.പി.എം, ലീഗ് പ്രവർത്തകർക്കെതിരെ വളയം പൊലീസ് കേസെടുത്തു. വാണിമേൽ ഒന്നാം വാർഡിൽ നിരത്തുമ്മൽ പീടികയിലെ അൻവാറുൽ ഇസ്ലാം മദ്റസ ബൂത്തിലാണ് അക്രമം അരങ്ങേറിയത്.
വോട്ടെടുപ്പ് ദിവസം ഇരുകൂട്ടരും ബൂത്തിന് മുമ്പിൽ പരസ്പപരം ക്രമസമാധാന പ്രശ്നങ്ങൾ സൃഷ്ടിക്കുകയും പൊതുജനത്തിന് ശല്യമുണ്ടാകും വിധത്തിൽ കുറ്റകൃത്യത്തിൽ ഏർപ്പെട്ടെന്നും ഗതാഗത തടസ്സം സൃഷ്ടിച്ചെന്നുമാണ് പൊലീസ് പറയുന്നത്. ആളുകളെ പിരിച്ചുവിടാൻ സ്ഥലത്ത് ടിയർ ഗ്യാസ് ഷെൽ പൊട്ടിക്കുകയും ലാത്തിച്ചാർജ് നടത്തുകയും ചെയ്തിരുന്നു. എന്നാൽ, പൊലീസ് ഏകപക്ഷീയ നടപടിയാണ് സ്വീകരിച്ചതെന്നാണ് നാട്ടുകാരും ലീഗ് നേതാക്കളും ആരോപിക്കുന്നത്. ഇതിനിടയിലാണ് കേസെടുത്തത്.
