കോഴിക്കോട് : നിപ വൈറസ് ആശങ്ക നിലനിൽക്കുന്ന കോഴിക്കോട് അതീവ ജാഗ്രതയിൽ. നിപ ലക്ഷണങ്ങളോടെ രണ്ടുപേർ മരിക്കുകയും ഇവരുമായി സമ്പർക്കത്തിലുള്ള നാലുപേർ ആശുപത്രിയിൽ പ്രവേശിക്കപ്പെടുകയും ചെയ്തതോടെ ആരോഗ്യവകുപ്പ് ജില്ലയിൽ ജാഗ്രതനിർദേശം പുറപ്പെടുവിച്ചു. ശക്തമായ പ്രതിരോധ പ്രവർത്തനങ്ങൾക്ക് തുടക്കമിട്ടതായി ആരോഗ്യമന്ത്രി അറിയിച്ചു. 2018 ൽ 17 പേരുടെ ജീവനെടുത്ത നിപ വൈറസ് ബാധ ആദ്യം സ്ഥിരീകരിച്ച പഞ്ചായത്തിന് സമീപത്ത് തന്നെയുള്ള മരുതോങ്കര പഞ്ചായത്തിലാണ് ഇത്തവണ നിപ സംശയിക്കപ്പെടുന്നത്.
