“ചെങ്കണ്ണ്” അഥവാ കൺജങ്ക്റ്റിവൈറ്റിസ് എന്നറിയപ്പെടുന്ന അസുഖം വ്യാപകമാകാൻ സാധ്യതയുള്ള സമയമാണിത്. മഴക്കാലം ആയതോടെയാണ് ചെങ്കണ്ണ് വ്യാപകമാകാനുള്ള സാധ്യത വർദ്ധിക്കുന്നത്. കണ്ണിന്റെ വെളുത്ത ഭാഗത്തെയും കണ്പോളകളുടെ ഉൾഭാഗത്തെയും മൂടുന്ന സുതാര്യ സ്തരമായ കൺജങ്ക്റ്റിവയുടെ വീക്കമാണ് ചെങ്കണ്ണ് എന്നറിയപ്പെടുന്നത്. ബാക്ടീരിയ അല്ലെങ്കിൽ വൈറൽ അണുബാധകൾ മൂലവും അലർജി പ്രതിപ്രവർത്തനങ്ങൾ മൂലവും ചെങ്കണ്ണ് പിടിപെടാം.

മഴക്കാലത്ത്, അലർജി പ്രശ്നങ്ങൾ കൂടുന്നതും, ടവലുകൾ പോലുള്ള വ്യക്തിഗത വസ്തുക്കൾ പങ്കിടുന്നത്, മലിനമായ മഴവെള്ളവുമായുള്ള സമ്പർക്കം എന്നിവ കാരണം ചെങ്കണ്ണ് ഒരാളിൽനിന്ന് മറ്റുള്ളവരിലേക്ക് പടരാനുള്ള സാധ്യത വർദ്ധിക്കുന്നു. മഴക്കാലത്ത് അന്തരീക്ഷ ഈർപ്പം കൂടുന്നത്, ബാക്ടീരിയകളുടെയും വൈറസുകളുടെയും വളർച്ചയ്ക്ക് അനുയോജ്യമായ സാഹചര്യങ്ങൾ സൃഷ്ടിക്കുന്നു.