കോഴിക്കോട്: സഹപാഠികളുടേയും അധ്യാപകരുടെയും ചിത്രങ്ങൾ രഹസ്യമായി പകർത്തി സാമൂഹികമാധ്യമമായ ടെലിഗ്രാമിലൂടെ വിറ്റുവെന്ന പരാതിയിൽ വിദ്യാർഥി അറസ്റ്റിൽ. കോഴിക്കോട്ടെ സ്വകാര്യ സ്ഥാപനത്തിലെ വിദ്യാർഥിയും തിക്കോടി സ്വദേശിയുമായ ആദിത്യദേവിനെയാണ് കസബ പോലീസ് അറസ്റ്റ് ചെയ്ത് വിട്ടയച്ചത്.
ക്ലാസ് മുറികളിൽനിന്നാണ് സഹപാഠികളുടേയും അധ്യാപകരുടേയും ശരീര ഭാഗങ്ങൾ ആദിത്യദേവ് അവരറിയാതെ പകർത്തിയത്. തുടർന്ന് ഈ ചിത്രങ്ങൾ ഇയാൾ ടെലഗ്രാമിലൂടെ വിൽക്കാൻ ശ്രമിക്കുകയായിരുന്നു. സംഭവം ശ്രദ്ധയിൽപെട്ട വിദ്യാർഥികൾ കോളേജ് അധികൃതരെ വിവരം അറിയിക്കുകയായിരുന്നു.
തുടർന്ന് കോളേജ് മാനേജ്‌മെൻ്റ് കോഴിക്കോട് സൈബർ പൊലീസ് സ്റ്റേഷനിലും കസബ സ്റ്റേഷനിലും പരാതി നൽകി. പിന്നാലെ പോലീസ് എഫ്.ഐ.ആർ. രജിസ്റ്റർ ചെയ്യുകയായിരുന്നു. വിദ്യാർഥിയെ സ്ഥാപനത്തിൽനിന്ന് സസ്പെൻഡ് ചെയ്തതായി മാനേജ്മെന്റ് അറിയിച്ചു.
