തിരുവനന്തപുരം: ഉപതിരഞ്ഞെടുപ്പുമായി ബന്ധപ്പെട്ട വോട്ടെടുപ്പ് നടക്കുന്ന ജൂൺ 19ന് നിലമ്പൂർ നിയമസഭാ മണ്ഡലത്തിന്റെ പരിധിയിൽ വരുന്ന എല്ലാ സർക്കാർ ഓഫിസുകൾക്കും വിദ്യാഭ്യാസ സ്ഥാപനങ്ങൾക്കും പൊതുഅവധി പ്രഖ്യാപിച്ചു. 1881 ലെ നെഗോഷ്യബിൾ ഇൻസ്ട്രുമെന്റ്സ് ആക്ടിന് കീഴിലുള്ള എല്ലാ സ്ഥാപനങ്ങൾക്കും ശമ്പളത്തോട് കൂടിയ അവധിയായും സർക്കാർ ഉത്തരവ് പുറപ്പെടുവിച്ചു.
അന്നേ ദിവസം ഷോപ്പ്സ് ആൻഡ് കൊമേഴ്സ്യൽ എസ്റ്റാബ്ലിഷ്മെന്റ് ആക്ടിന് കീഴിലുള്ള സ്വകാര്യ സ്ഥാപനങ്ങളിലെ ജീവനക്കാർക്ക് ശമ്പളത്തോട് കൂടിയ അവധിയായി പ്രഖ്യാപിക്കുന്നതിന് ലേബർ കമ്മിഷണർ ആവശ്യമായ ക്രമീകരണങ്ങൾ ഏർപ്പെടുത്തുന്നതാണെന്ന് മുഖ്യതിരഞ്ഞെടുപ്പ് ഓഫിസർ ഡോ. രത്തൻ യു. ഖേൽകർ അറിയിച്ചു.
പോളിങ്ങിന്റെ അവസാന സമയത്തിനു തൊട്ടുമുന്‍പുള്ള 48 മണിക്കൂര്‍ ഡ്രൈ ഡേ ആയിരിക്കും. പോളിങ് ഏരിയയ്ക്കുള്ളിലെ ഹോട്ടലുകള്‍, ഭക്ഷണശാലകള്‍, മദ്യശാലകള്‍, മറ്റു കച്ചവടസ്ഥാപനങ്ങള്‍, സ്വകാര്യസ്ഥലം എന്നിവിടങ്ങളില്‍ മദ്യമോ സമാനമായ മറ്റു വസ്തുക്കളോ വില്‍ക്കാനോ നല്‍കാനോ വിതരണം ചെയ്യാനോ പാടില്ല.
