പയ്യോളി: സമൂഹസേവനത്തിന്റെ ഉജ്ജ്വല മാതൃകകൾ സൃഷ്ടിച്ചുകൊണ്ടിരിക്കുന്ന പയ്യോളി ലയൺസ് ക്ലബ്ബ് മറ്റൊരു കാരുണ്യ പ്രവർത്തനത്തിന് കൂടി സാക്ഷ്യം വഹിച്ചു. ലയൺസ് 318 E യുടെയും, ചിറ്റിലപള്ളി ഫൗണ്ടേഷന്റെയും ധന സഹായ സഹകരണത്തോടെ ഈ വർഷം നിർമ്മാണം പൂർത്തിയാക്കിയ രണ്ട് വീടുകളിൽ ഒന്നിന്റെ താക്കോൽദാന ചടങ്ങ് കടലൂരിൽ ഹൃദ്യമായ അന്തരീക്ഷത്തിൽ നടന്നു. സ്വന്തമായി ഒരു വീടെന്ന ദീർഘകാല സ്വപ്നം യാഥാർഥ്യമായതിന്റെ സന്തോഷനിമിഷത്തിൽ, പയ്യോളി ലയൺസ് ക്ലബ്ബ് പ്രസിഡണ്ട് ലയൺ ഫൈസൽ എം, മൂടാടി കടലൂർ സ്വദേശിനിയായ കോടിയോട്ട് വയൽ കുനി ശ്രീമതി ലീലയ്ക്ക് വീടിന്റെ താക്കോൽ കൈമാറി. ജീവിതത്തിന്റെ ദുരിതപാതകളിലൂടെ സഞ്ചരിച്ച ഒരു കുടുംബത്തിന് സുരക്ഷിതമായ അഭയകേന്ദ്രം സമ്മാനിച്ച ഈ നിമിഷം സേവനത്തിന്റെ മഹത്വം വിളിച്ചോതുന്നതായി.
ചടങ്ങിൽ ഐ.പി.പി. ലയൺ രവീന്ദ്രൻ അമ്പാടി, സെക്രട്ടറി ലയൺ ഡെനിസൻ ജി.സി, ഡിസ്ട്രികട് കോ-ഓഡിനേറ്റർമാരായ ലയൺ മോഹനൻ വൈദ്യർ, ലയൺ എം.പി. ജിതേഷ്, ക്ലബ് അംഗങ്ങളായ ലയൺ പ്രഭാകരൻ എൽ, ലയൺ ബിനീഷ് ആർ.കെ. എന്നിവർ പങ്കെടുത്തു.
വീട് എന്നത് വെറും ചുമരുകളും മേൽക്കൂരയും മാത്രമല്ല, പ്രതീക്ഷകളും സുരക്ഷയും ആത്മവിശ്വാസവും നിറഞ്ഞ ഒരു ജീവിതവേദിയാണെന്ന് ചടങ്ങിൽ പങ്കെടുത്തവർ അഭിപ്രായപ്പെട്ടു. അർഹരായ കുടുംബങ്ങൾക്ക് കൈത്താങ്ങായി മാറുന്ന ഇത്തരം പ്രവർത്തനങ്ങൾ സമൂഹത്തിൽ കരുണയുടെയും സഹജീവിസ്നേഹത്തിന്റെയും സന്ദേശമാണ് പകരുന്നതെന്നും അവർ പറഞ്ഞു. മനുഷ്യത്വത്തിന്റെയും സേവനത്തിന്റെയും പാതയിൽ മുന്നേറുന്ന പയ്യോളി ലയൺസ് ക്ലബ്ബിന്റെ ഈ ഭവന സമർപ്പണം, ഒരു കുടുംബത്തിന്റെ ജീവിതത്തിൽ പുതുവെളിച്ചം പകരുന്നതോടൊപ്പം സമൂഹസേവനത്തിന്റെ മറ്റൊരു സുവർണ അധ്യായമായും മാറി.
