ദീപാവലിക്ക് മുന്നോടിയായി മുംബൈയിലെ വായു ഗുണനിലവാരം ഏറ്റവും താഴ്ന്ന സൂചികയില്‍. 9 സ്ഥലങ്ങളില്‍ ‘മോശം’, ‘വളരെ മോശം’ വായു ഗുണനിലവാര സൂചികയാണ് രേഖപ്പെടുത്തിയത്. ദീപാവലി ആഘോഷ വേളയിൽ പടക്കങ്ങളുടെ ഉപയോഗം വർദ്ധിച്ചതും നിർമ്മാണ പ്രവർത്തനങ്ങൾ നടന്നുകൊണ്ടിരിക്കുന്നതുമാണ് മുംബൈയിലെ വായുവിൻ്റെ ഗുണനിലവാരം മോശമാകാൻ കാരണമെന്ന് വിദഗ്ധര്‍ പറയുന്നു.
ദീപാവലി ദിനമായ ഇന്നലെ രാവിലെ മുംബൈയിലെ മൊത്തത്തിലുള്ള വായു ഗുണനിലവാര സൂചിക (AQI) ഗണ്യമായി ഇടിഞ്ഞു. നഗരത്തിൽ വായു ഗുണനിലവാര സൂചിക 187 ആണ് രേഖപ്പെടുത്തിയത്, ഒക്ടോബർ 10ന് മൺസൂൺ പിൻവാങ്ങിയതിനുശേഷം രേഖപ്പെടുത്തിയ ഏറ്റവും മോശം അവസ്ഥയാണിത്.
കേന്ദ്ര മലിനീകരണ നിയന്ത്രണ ബോർഡിൻ്റെ (സിപിസിബി) ഡാറ്റ കാണിക്കുന്നത് മുംബൈയിൽ പ്രവർത്തിക്കുന്ന 24 വ്യത്യസ്ത വായു ഗുണനിലവാര സൂചിക നിരീക്ഷണ കേന്ദ്രങ്ങളിൽ ഒമ്പതെണ്ണത്തിൽ ‘മോശം’, ‘വളരെ മോശം’ വായു ഗുണനിലവാര സൂചിക രേഖപ്പെടുത്തിയിട്ടുണ്ടെന്നാണ്.
സിപിസിബി ഡാഷ്‌ബോർഡ് അനുസരിച്ച്, ബാന്ദ്ര കുർള കോംപ്ലക്‌സിൽ (ബികെസി) 334 എന്ന എക്യുഐ റീഡിംഗ് രേഖപ്പെടുത്തി. തുടർന്ന് കൊളബയിൽ (നേവി നഗർ) 274, ദിയോണറിൽ 268, വിലെ പാർലെയിൽ 264, അന്ധേരി ഈസ്റ്റിൽ 257, ബാന്ദ്ര ഈസ്റ്റിൽ 238, മലാഡിൽ 214, വർലിയിൽ 201 എന്നിങ്ങനെയാണ്.
