ദുബായ്: ഇറാൻ-ഇസ്രായേൽ സംഘർഷം അതിരൂക്ഷമായതിനെത്തുടർന്ന് ഗൾഫ് മേഖലയിൽ വിമാന സർവീസുകൾ തടസ്സപ്പെട്ട യാത്രക്കാർക്ക് ആശ്വാസമായി പ്രമുഖ വിമാനക്കമ്പനികൾ റീഫണ്ടും റീബുക്കിംഗ് സൗകര്യവും പ്രഖ്യാപിച്ചു. ഇറാന്റെ പരമോന്നത നേതാവ് ആയത്തുള്ള അലി ഖമനയി കൊല്ലപ്പെട്ടതിന് പിന്നാലെ മേഖലയിലുണ്ടായ ഡ്രോൺ-മിസൈൽ ആക്രമണങ്ങളെത്തുടർന്ന് യുഎഇ ഉൾപ്പെടെയുള്ള രാജ്യങ്ങൾ വ്യോമപാതയിൽ നിയന്ത്രണം ഏർപ്പെടുത്തിയിരുന്നു.

പ്രധാന വിമാനക്കമ്പനികളുടെ അറിയിപ്പുകൾ:

എമിറേറ്റ്‌സും ഫ്ലൈ ദുബായിയും: ഞായറാഴ്ച ഉച്ചയ്ക്ക് 3 മണി വരെ സർവീസുകൾ നിർത്തിവെച്ചു. അടുത്ത മൂന്ന് ദിവസത്തിനുള്ളിൽ യാത്ര ചെയ്യേണ്ടവർക്ക് പത്തു ദിവസത്തിനുള്ളിൽ സൗജന്യമായി യാത്ര പുനഃക്രമീകരിക്കാം. തുക തിരികെ ലഭിക്കാൻ ആഗ്രഹിക്കുന്നവർക്ക് റീഫണ്ടിന് അപേക്ഷിക്കാവുന്നതാണ്.

എത്തിഹാദ് എയർവേയ്‌സ്: അബുദാബിയിലേക്കും തിരിച്ചുമുള്ള സർവീസുകൾ തിങ്കളാഴ്ച ഉച്ചയ്ക്ക് 2 മണി വരെ റദ്ദാക്കി. ഫെബ്രുവരി 28-ന് മുമ്പ് ടിക്കറ്റ് ബുക്ക് ചെയ്തവർക്ക് മാർച്ച് 15 വരെ സൗജന്യമായി തീയതി മാറ്റി നൽകും. റദ്ദാക്കിയ വിമാനങ്ങളിലെ യാത്രക്കാർക്ക് ടിക്കറ്റ് തുക പൂർണ്ണമായും റീഫണ്ട് നൽകും.

എയർ അറേബ്യ: ഞായറാഴ്ച ഉച്ചയ്ക്ക് 3 മണി വരെ സർവീസുകൾ നിർത്തിവെച്ചു. യാത്രക്കാർക്ക് തീയതി മാറ്റുകയോ അല്ലെങ്കിൽ ടിക്കറ്റ് തുക ഭാവി യാത്രകൾക്കായി ‘ക്രെഡിറ്റ്’ ആയി സൂക്ഷിക്കുകയോ ചെയ്യാം.

ഇൻഡിഗോ: സംഘർഷം മൂലം യാത്ര മുടങ്ങിയവർക്ക് പണം പൂർണ്ണമായി മടക്കി നൽകുമെന്ന് ഇൻഡിഗോ അറിയിച്ചു. ഫെബ്രുവരി 28-നോ അതിന് മുമ്പോ ബുക്ക് ചെയ്തവർക്ക് ഈ ആനുകൂല്യം ലഭിക്കും.

ഇറാന്റെ ആക്രമണത്തിൽ ദുബായ് അന്താരാഷ്ട്ര വിമാനത്താവളത്തിന് നേരിയ നാശനഷ്ടങ്ങൾ സംഭവിച്ചതായും അബുദാബി സായിദ് അന്താരാഷ്ട്ര വിമാനത്താവളത്തിലുണ്ടായ ഡ്രോൺ ആക്രമണത്തിൽ ഒരാൾ കൊല്ലപ്പെടുകയും ഏഴ് പേർക്ക് പരിക്കേൽക്കുകയും ചെയ്തതായും റിപ്പോർട്ടുകളുണ്ട്. മേഖലയിലെ 27 യുഎസ് സൈനിക കേന്ദ്രങ്ങളിലും ഇസ്രായേലിലെ പ്രധാന സൈനിക ആസ്ഥാനങ്ങളിലും ആക്രമണം നടത്തിയതായി ഇറാൻ റെവല്യൂഷണറി ഗാർഡ്‌സ് അവകാശപ്പെട്ടു. നിലവിലെ സാഹചര്യത്തിൽ മാറ്റങ്ങൾ വരാൻ സാധ്യതയുള്ളതിനാൽ യാത്രക്കാർ വിമാനത്തിന്റെ സ്റ്റാറ്റസ് പരിശോധിക്കണമെന്ന് അധികൃതർ നിർദ്ദേശിച്ചു.