ട്രെയിന്‍ യാത്രയ്ക്കിടയില്‍ ഫോണൊന്ന് ചാർജ് ചെയ്യണമെങ്കിൽ നമ്മളെല്ലാം ആദ്യം ആശ്രയിക്കുന്നത് പൊതു ചാര്‍ജിങ് പോയിൻ്റുകളെയാണല്ലേ ? ട്രെയിന്‍ നിര്‍ത്തിയിടുന്ന ഗ്യാപ്പിലും വണ്ടി വരാനുള്ള ഗ്യാപ്പിലുമൊക്കെ നമ്മള്‍ ഈ പൊതു ചാര്‍ജിങ് പോയിന്‍റുകളെയായിരിക്കും ആശ്രയിക്കുന്നത്. അതില്‍ ഒരു അപകടം ഒളിച്ചിരിപ്പുണ്ടെന്ന് അറിയാമോ… ? കേരള പൊലീസാണ് സുരക്ഷയെ സംബന്ധിച്ച വിവരം പുറത്തുവിട്ടിരിക്കുന്നത്. പൊതു ചാ‍ർജിംഗ് പോയിന്റുകൾ ഉപയോഗിച്ച് ഫോണിൽ നിന്ന് വ്യക്തി വിവരങ്ങൾ ചോർത്തുന്ന ജ്യൂസ് ജാക്കിങ്ങെന്ന തട്ടിപ്പിനെതിരെയാണ് മുന്നറിയിപ്പ്.
എന്താണ് ജ്യൂസ് ജാക്കിങ് ?
മാളുകള്‍, റെസ്റ്റോറന്‍റുകള്‍, റെയില്‍വേ സ്റ്റേഷനുകള്‍/ട്രെയിനുകള്‍ വഴി ഡാറ്റയും വ്യക്തിഗത വിവരങ്ങളും മോഷ്ടിക്കുന്ന സൈബര്‍ തട്ടിപ്പാണ് ‘ജ്യൂസ് ജാക്കിങ്’. സാധാരണ ചാര്‍ജിങ് കേബിള്‍ പോലെ തോന്നിക്കുന്ന ‘മാല്‍വെയര്‍ കേബിളുകള്‍’ ഉപയോഗിച്ചാണ് പൊതു ചാര്‍ജിങ് പോയന്‍റുകളില്‍ സൈബര്‍ കുറ്റവാളികള്‍ തട്ടിപ്പു നടത്തുന്നത്. ഇത്തരത്തിലുള്ള വ്യാജ കേബിളില്‍ കണക്ട് ചെയ്യുന്ന ഫോണുകളിലെ ബാങ്കിങ് വിവരങ്ങള്‍, ഫോട്ടോകള്‍, കോണ്‍ടാക്റ്റ് ലിസ്റ്റ് തുടങ്ങിയ ഡാറ്റകള്‍ തട്ടിപ്പുകാര്‍ കൈക്കലാക്കുകയാണ് ചെയ്യുന്നത്.
എങ്ങനെ ജ്യൂസ് ജാക്കിങിൽ നിന്ന് രക്ഷപ്പെടാം ?
പൊതു ഇടങ്ങളില്‍ ചാര്‍ജ് ചെയ്യുമ്പോള്‍ മൊബൈല്‍ ഫോണ്‍ സ്വിച്ച് ഓഫ് ചെയ്യുക. കൂടുതും പവര്‍ ബാങ്ക് ഉപയോഗിക്കുക, പൊതു ഇടങ്ങളിലും പവര്‍ ബാങ്ക് ചാര്‍ജ്ചെയ്ത് ഫോണില്‍ ചാര്‍ജ് ആക്കുക, യു.എസ്.ബി ഡേറ്റ ബ്ലോക്കര്‍ ഉപയോഗിക്കുക, പൊതുഇടങ്ങളില്‍ ഫോണ്‍ ചാര്‍ജ് ചെയ്യുന്നതിനിടയില്‍ പാറ്റേണ്‍ ലോക്ക്, പാസ് വേഡ് എന്നിവ ഉപയോഗിക്കാതിരിക്കുക. ഇത്തരത്തിലൊരു അപകടം ആരും പ്രതീക്ഷിക്കാത്തതിനാല്‍ ഇത്തരത്തിലൊരു അപകട സാധ്യതയും ആരും ചിന്തിക്കുന്നില്ല. ഫോണുപയോഗിക്കുന്ന സാക്ഷ്മത പോലെതന്നെ ചാര്‍ജിങ് പോയന്‍റുകള്‍ ഉപയോഗിക്കുമ്പോഴും അതീവ ജാഗ്രതയും ശ്രദ്ധയും പുലര്‍ത്തുക.
