കോഴിക്കോട്: ട്രെയിനുകളില്‍ പുതിയ മാറ്റവുമായി റെയില്‍വേ. സ്ലീപ്പർ ക്ലാസ് യാത്ര ചെയ്യുന്നവർക്ക് ഇനി പുതപ്പും തലയണയും ലഭ്യമാകും. പണം നല്‍കി ഇവ ആവശ്യപ്പെടുന്നവർക്ക് മാത്രമാകും ഈ സൗകര്യം ലഭ്യമാകുക. ഈ പദ്ധതി ചെന്നൈ ഡിവിഷനിലെ 10 ട്രെയിനുകളില്‍ മാത്രമേ ലഭ്യമാകു.
ഒരു ബെഡ്ഷീറ്റ്, തലയണ, തലയണ കവർ എന്നിവയ്ക്ക് 50 രൂപയാണ് നല്‍കേണ്ടി വരുക. തലയണയ്ക്കും തലയണ കവറിനും 30 രൂപയും ബെഡ്ഷീറ്റിന് 20 രൂപയും എന്നിങ്ങനെയാണ് നിരക്കുകള്‍.
അണുവിമുക്തമാക്കിയ ബെഡ് റോളുകള്‍ അടുത്ത വര്‍ഷം ജനുവരി 1 മുതല്‍ നല്‍കുമെന്ന് ദക്ഷിണ റെയില്‍വേയുടെ ചെന്നൈ ഡിവിഷൻ അറിയിച്ചു. കേരളത്തില്‍ നിന്നുള്ള യാത്രക്കാർക്കും ഈ സൗകര്യം പ്രയോജനപ്പെടുത്താനാകും. പദ്ധതി ആരംഭിക്കുന്ന ട്രെയിനുകളുടെ പട്ടികയില്‍ കേരളത്തില്‍ നിന്നുള്ള മൂന്ന് സർവീസുകള്‍ ഉള്‍പ്പെടുത്തിയിട്ടുണ്ട്
കേരളത്തിലൂടെ ഓടുന്ന മംഗളൂരു-ചെന്നൈ-മംഗളൂരു സൂപ്പർഫാസ്റ്റ് (12685/ 12686), പാലക്കാട് എക്സ്പ്രസ് (22651/ 22652), തിരുവനന്തപുരം സൂപ്പർഫാസ്റ്റ് എക്സ്പ്രസ് (12695/12696), ആലപ്പി സൂപ്പർഫാസ്റ്റ് എക്സ്പ്രസ് (22639/ 22640), മംഗളൂരു-ചെന്നൈ എക്സ്പ്രസ് (16159/16160) എന്നീ ട്രെയിനുകളിലെ സ്ലീപ്പർ ക്ലാസ് യാത്രക്കാർക്കാണ് സേവനം ലഭിക്കുക.
