വീണ്ടും  കത്തിക്കയറി സംസ്ഥാനത്തെ സ്വർണ്ണ വില. ഇന്ന് പവന് 560 രൂപയും, ഗ്രാമിന് 70 രൂപയുമാണ് വില കൂടിയത്. ഇന്ന് പവന് 72,120 രൂപയും, ഗ്രാമിന് 9,015 രൂപയുമാണ് വില. ഇത് സംസ്ഥാനത്തിന്റെ ചരിത്രത്തിലെ പുതിയ സർവ്വകാല ഉയരമാണ്. ഇതാദ്യമായാണ് ഗ്രാം വില 9,000 രൂപ നിലവാരം മറികടക്കുന്നത്. രാജ്യാന്തര സ്വർണ്ണ വിലയിലെ കുതിപ്പാണ് കേരളത്തിലും വില വർധനയ്ക്ക് കാരണമായത്. നിലവിൽ ആഗോള വില ട്രോയ് ഔൺസിന് 3,370.40 ഡോളർ നിലവാരത്തിലാണ്.

നിലവിൽ കേരളത്തിൽ ഒരു പവൻ സ്വർണ്ണത്തിന് ഏകദേശം 77,000 രൂപയാണ് നൽകേണ്ടത്. 3% ജി.എസ്.ടി, ചെറിയ ഹോൾമാർക്കിങ് ചാർജ്ജ്, കുറ‍ഞ്ഞ പണിക്കൂലിയായി 5% എന്നിവ കണക്കാക്കുമ്പോഴാണിത്. 30% വരെ പണിക്കൂലിയുള്ള ആഭരണങ്ങളുണ്ട്. ഇത്തരത്തിൽ ഉയർന്ന മേക്കിങ് ചാർജ്ജുള്ള സ്വർണ്ണാഭരണങ്ങൾക്ക് പവന് ഒരു ലക്ഷം രൂപയോളം വില വരും.

കേരളത്തിലെ സ്വർണ്ണ വില ഏപ്രിൽ മാസത്തെ താഴ്ന്ന നിലവാരത്തിലെത്തിയത് 8ാം തിയ്യതിയാണ്. അന്ന് പവന് 65,800 രൂപയും, ഗ്രാമിന് 8,225 രൂപയുമായിരുന്നു വില. ഇവിടെ നിന്ന് ഇതു വരെ ഏകദേശം രണ്ടാഴ്ച്ച കൊണ്ട് ഒരു പവന് 6,320 രൂപയും, ഗ്രാമിന് 790 രൂപയുമാണ് വില ഉയർന്നിരിക്കുന്നത്.

പുതിയ ഉയരത്തിൽ രാജ്യാന്തര വില
ഇന്ന്, തിങ്കളാഴ്ച്ച രാവിലത്തെ വ്യാപാരത്തിൽ രാജ്യാന്തര സ്വർണ്ണ വില 3,375 ഡോളർ എന്ന സർവ്വകാല ഉയരം തൊട്ടു. ഇത്തരത്തിൽ ഒരു ദിവസത്തിൽ 1.43% ഉയർച്ചയാണ് നേടിയത്. യു.എസിന്റെ താരിഫ് നയങ്ങൾ സംബന്ധിച്ച അനിശ്ചിതത്ത്വമാണ് സുരക്ഷിത നിക്ഷേപം എന്ന നിലയിൽ സ്വർണ്ണത്തിന്റെ ഡിമാൻഡ് വർധിപ്പിക്കുന്നത്. യു.എസ് ഫെഡിന്റെ നയങ്ങൾ യു.എസ് ഡോളറിന് തിരിച്ചടി നൽകുന്നു. ഡോളർ സൂചിക ഇടിവ് നേരിടുന്നത് സ്വർണ്ണത്തിന് അനുകൂലമായ ഘടകമാണ്. ഇക്കഴിഞ്ഞ ജനുവരി മുതൽ ഇതു വരെ രാജ്യാന്തര സ്വർണ്ണ വിലയിൽ 25% ഉയർച്ചയാണ് രേഖപ്പെടുത്തിയിരിക്കുന്നത്.

വെള്ളി വില
കേരളത്തിലെ വെള്ളി വിലയിൽ ഇന്ന് കുറവുണ്ട്. ഒരു കിലോ വെള്ളിക്ക് 100 രൂപ താഴ്ന്ന് 1,09,900 രൂപ എന്നതാണ് നിരക്ക്. ഒരു ഗ്രാം വെള്ളിക്ക് 109.90 രൂപ, 8 ഗ്രാമിന് 879.20 രൂപ, 10 ഗ്രാമിന് 1,099 രൂപ, 100 ഗ്രാമിന് 10,990 രൂപ എന്നിങ്ങനെയാണ് വില നിലവാരം.