കൊച്ചി: മദ്യപിക്കാൻ പണം നൽകാത്തതിനെത്തുടർന്നുണ്ടായ തർക്കത്തിൽ 78 കാരിയായ അമ്മയെ മകൻ അടിച്ചു കൊന്നു. ഫോർട്ട് കൊച്ചിയിലാണ് നാടിനെ ഞെട്ടിച്ച കൊലപാതകം നടന്നത്. സംഭവത്തിൽ ലക്ഷ്മിയെ കൊലപ്പെടുത്തിയ മകൻ കണ്ണനെ ഫോർട്ട് കൊച്ചി പോലീസ് അറസ്റ്റ് ചെയ്തു. ഇന്നലെ രാത്രി ഏഴോടെയായിരുന്നു സംഭവം ​മദ്യപിക്കാൻ പണം ആവശ്യപ്പെട്ടെങ്കിലും അമ്മ നൽകിയിരുന്നില്ല. ഇതിന്റെ ദേഷ്യത്തിലിരിക്കെ, വീട്ടിലെ ഗ്യാസ് സിലിണ്ടർ ലക്ഷ്മി മറ്റൊരാൾക്ക് എടുത്തു കൊടുത്തത് മകൻ ചോദ്യം ചെയ്യുകയും ഇത് വലിയ തർക്കത്തിലേക്ക് നയിക്കുകയുമായിരുന്നു. തർക്കത്തിനിടയിൽ മകൻ അമ്മയെ ക്രൂരമായി മർദ്ദിക്കുകയായിരുന്നു. ഗുരുതരമായി പരിക്കേറ്റ ലക്ഷ്മിയെ ഉടൻ തന്നെ ആശുപത്രിയിലേക്ക് മാറ്റിയെങ്കിലും ജീവൻ രക്ഷിക്കാനായില്ല. കൊലപാതകത്തിന് ശേഷം പോലീസ് കസ്റ്റഡിയിലെടുത്ത പ്രതിയുടെ നടപടിക്രമങ്ങൾ പുരോഗമിക്കുകയാണ്. ലക്ഷ്മിയുടെ മൃതദേഹം പോസ്റ്റ്‌മോർട്ടത്തിനായി എറണാകുളം ജനറൽ ആശുപത്രിയിലേക്ക് മാറ്റി.