തിരുവനന്തപുരം: കാഫിർ സ്ക്രീൻ ഷോട്ട് നിർമിക്കാൻ നിർദേശം നൽകി എന്ന വ്യാജ പ്രചരണത്തിൽ പരാതി നൽകി എ എ റഹീം എംപി. തിരുവനന്തപുരം മെഡിക്കൽ കോളേജ് പൊലീസ് സ്റ്റേഷനിലാണ് പരാതി നൽകിയത്. ഫേസ്ബുക്ക് പോസ്റ്റിലൂടെയാണ് പരാതിയുടെ വിവരം എ എ റഹീം അറിയിച്ചത്.
വ്യാജപ്രചരണങ്ങൾക്കെതിരായ നിയമനടപടികൾ തുടരുന്നതിന്റെ ഭാഗമായി മറ്റൊരു വ്യാജ പ്രചരണത്തിനെതിരായി തിരുവനന്തപുരം മെഡിക്കൽ കോളേജ് പോലീസ് സ്റ്റേഷനിൽ പരാതി സമർപ്പിച്ചു എന്നായിരുന്നു ഫേസ്ബുക് പോസ്റ്റ്. നവമാധ്യമത്തിലെ ഇത്തരം വ്യാജ പ്രചരണങ്ങൾക്കും അധിക്ഷേപങ്ങൾക്കുമെതിരെ നിയമനടപടികളുമായി മുന്നോട്ട് പോകുമെന്നും പോസ്റ്റിലുണ്ട്.
കാഫിർ സ്ക്രീൻ ഷോട്ട് നിർമിച്ചത് ഡിവൈഎഫ്ഐ നേതാവ് എ എ റഹീമിന്റെ നിർദേശപ്രകാരമെന്ന് പ്രതി ജിതിൻ ഭാസ്കർ മൊഴി നൽകി എന്നായിരുന്നു പ്രചരണം. അഗസ്റ്റിൻ ചെറുപുഴ, സാജൻ അൽഫോൺസ് എന്നീ പ്രൊഫെലുകളിൽ നിന്നും ഇത് പോസ്റ്റ് ചെയ്തിരിക്കുന്ന സ്ക്രീൻ ഷോട്ടും റഹീമിന്റെ പോസ്റ്റിനൊപ്പമുണ്ട്.
